आमा !
एउटा मिठो सपना टिपेर ल्याउँछु
अनि तिम्रो शिरमा सजाउँछु
प्रिया!
एक अन्जुली पानी सोरेर ल्याउँछु
अनि तिम्रो तिर्खा मेटाउँछु
ए देश !
पर्ख म अमन खोजेर ल्याउँछु
अनि खेतका आली आली
शान्तिको गीत गाउँछु
यस्तै थुप्रै वाचा गरेर
समुद्रको देश पुगेको
आज ठिक एक वर्षपछि
पार्सल बनाउने कम्पनीमा
पार्सल बनाउँदा बनाउँदै
ऊ आफै पार्सल बनेर
पठाउँछ एउटा उपहार
काठको बक्सामा
लेखिएको थियो
ठेगाना 'नेपाल '
प्रापक 'मायादेवी '
प्रेषक 'बुद्ध' ।

बिना तामाङ 'सुनगाभा'
बुढानिलकण्ठ,काठमाण्डौ