क्रान्तिवीर भीमदत्तको योगदानलाई लिएर बनाईएको चलचित्र भीमदत्त फागुन २२ गते देख मुलुकभरका हलहरुमा चलिरहेको छ ।

समसामयिक नेपाली राजनीतिमा देखिएको विकृतिलाई उठान गर्दै भीमदत्तले देखेको सपनालाई भीमदत्त चलचित्रमा उतारिएको छ ।

अमेरिकाबाट चलचित्र निर्देशन शिक्षा लिएका भीमदत्तका निर्देशक हिमग्याप लामा ,टासीसंग, भीमदत्त चलचित्रबारे गरिएको कुराकानीस्

भीमदत्त चलचित्र कस्तो चल्दैछ ?

फागुन २२ देखि देशभरका चलचित्रभवनहरुमा  भीमदत्त चलचित्र चल्न थालेको हो । अहिले तेस्रो हप्तामा राजधानी लगायतका केही हलहरुमा चलिरहेको छ । भीमदत्तले राम्रै  व्यापार गरेको छ । हामी सन्तुष्ट छौ ।

यो त तपाईँको पहिलो चलचित्र हो , पहिलो चलचित्रको  अनुभव कस्तो छ ?

अपेक्ष गरे भन्दा धेरै राम्रो प्रतिक्रिया र स्यावासी मैले पाए । भीमदत्त विलकुलै नयाँ विषयमाथि बनेको चलचित्र हो ।नेपाली दर्शकको मनस्थिती भन्दा भिन्न विषय बोकेको चलचित्रले के गर्ला भन्ने थियो । हलमा पुगेर चलचित्र हेर्ने दर्शकको प्रतिक्रियाले पनि हामीलाई हौसाएको छ ।

ऐतिहासिक पात्रमाथि चलचित्र बनाउनु भयो , निमार्णका कठिनाई कस्ता रहे ?

हामीले चलचित्र निमार्ण गर्नु पूर्व नै  चलचित्र कस्तो बन्छ भन्ने कुराको निर्धारण गरेका थियौ । यस्ता ऐतिहासिक चलचित्रको बजारको खोजी पनि गर्नु जरुरी थियो ।

यस कारण हामीले भीमदत्तलाई विदेशमा प्रदर्शन गर्ने कामलाई जोड दियौ । जसले लगानीलाई सुरक्षित राख्ने काम गर्यो ।

यस पछि भीमदत्तको योगदानलाई जनसाधरणका बीचमा स्थापित गर्नु थियो , त्यसलाई ध्यान दिदै हलहरुमा चलायौ । च्यरिटी शोहरु गर्यौ । हामीले हल नै नभएका नेपालका  विकट क्षेत्रहरुमा पनि भीमदत्त देखायौ भने हलीउडजस्तो ठाउँमा पनि देखाउन सफल भयौ ।

नेपाली चलचित्र नचल्नुको कारण के होला र ?

भारतीय चलचित्रको आकामक प्रचार शैलीले नेपाली चलचित्रलाई दर्शकमाझ पुग्नै दिएको छैन् । अर्को महत्वपूर्ण पक्ष भनेको नेपाली चलचित्रहरुले आफ्नो स्तर बनाउनै सकेका छैनन् । चलचित्र विकासका लागि राज्य पनि लाग्नु पर्ने अवस्था छ । तर राज्य नेपाली चलचित्रप्रति उदासिन देखिन्छ ।

किन बन्दैनन राम्रा नेपाली चलचित्र र ?

निर्माणपक्ष वा निर्देशकलाई चलचित्रको राम्रो ज्ञान नहुनु नै नेपाली चलचित्रको स्तर माथि नउठ्नु हो ।

चलचित्र देशसंग गासिएको विषय हो । देश र जनतासंग जोडिएका विषहरु संवेदनशील हुन्छन् । त्यो संवेदनालाई वेवास्ता गर्दै बनेका चलचित्रले न देशको कुरा गर्न सक्छन् न त जनताको ।

अब के गर्नु पर्ला त र ?

चलचित्रकर्मीले देश र व्यापारलाई भिन्न ढंगबाट हेर्न सक्नु पर्यो । अझै पनि नेपाली चलचित्र संकटमै छ ।

सरकारले नेपाली चलचित्र मैत्री नीति ल्याउन पर्छ । आम दर्शकले नेपाली चलचित्रलाई माया  गरेर निर्देशक , निर्मातालाई सही सुझाव दिनु पर्यो ।

चलचित्र वितरक र चलचित्र हाल मालिकहरुले भारतीय चलचित्र भन्दा नेपाली चलचित्रलाई हलमा पुर्याउन जोड गर्नु जरुरी छ ।