१। योग्यता

स्कुल बिस्कुनझैँ छरिएको छ

क्याम्पस ‘टायम पास’ भएको छ

रोजगार बन्न चाउचाउ नै किन्नु परेपछि

योग्यता र दक्षता सबै धराशायी बनेको छ

२। पेवा

रगतले बेसाएर ल्याएको प्रजातन्त्र

मन्त्री, मन्त्रीपुत्र र मन्त्राणीको पेवा भो

कुराको चाङ् हौसिएर काम हराएपछि

राजनीति उल्टै जनताले नेतालाई गर्ने सेवा भो

३। एकता

ताप्लेजुङको घाउ दार्चुलालाई दुःख्नु पर्छ

रगतका मुहानहरू अब सबै सुक्नु पर्छ

घरझगडामा स्वार्थ र कमिसन मिसाउनेलाई

परिवारका सबै सदस्य मिलेर थुक्नु पर्छ

४। भाग

किसान सक्कली मलको माग गर्छ

व्यापारी नाफैनाफाको मात्र भाग गर्छ

सम्पन्नहरू छलेरै पनि काउली हसुर्छन् –

दरिद्रलाई त ओइलाएको साग पो भाग पर्छ

५। कुराको आरोहण

धान काट्नेभन्दा चेक काट्नेको कुरा ठूलो

चेक काट्नेभन्दा कमिसन बाँड्नेको कुरा ठूलो

कुरै कुराको आरोहण होडाजीमा –

कुरा काट्नेको हंकीडंकी नै सबैभन्दा ठूलो

पेशल आचार्य

टीकाथली–४, ललितपुर

हाल स् उपप्राध्यापक, मन्थली क्याम्पस, मन्थली, रामेछाप